Сезон грипĕ пекех А (H1N1) калаçнă чух, ӳсĕрнĕ чух сурчăкпа чирлĕ çынран сывă çынна ерет. Ӳсĕрекенсем, чирлекенсем патне 1 метртан çывăха пымалла мар, мерăсем йышăнмалла:
– аллăрпа сăмсăра, çăварăра ан лекĕр;
– тăтăшах алла супăньпе е спиртлă япаласемпе çумалла; 
– çынсем йышлăн пухăнакан çĕре тухса çӳремелле мар;
– чирлĕ çынсемпе çывăх хутшăнмалла мар;
– пӳлĕме, хваттере тăтăшах уçăлтармалла;
– сывă пурнăç йĕркине тытса пымалла, тăраниччен çывăрмалла, вăхăтра апатланмалла, физкультура хусканăвĕсем тумалла.
Маскăсемпе усă курасси çинчен мĕн калама пулать? Пĕтĕм тĕнчери сывлăх сыхлав организацийĕ çакăн çине мĕнле пăхать?
Эсир чирлĕ мар-тăк маска тăхăнма та кирлĕ мар.
Енчен те эсир чирлĕ çынна пăхатăр, ун çывăхне пынă чух маска тăхăнма пултаратăр. Çакăн хыççăн маскăна пăрахăçламалла, алла супăньпе çумалла.
Енчен те эсир чирлĕ, апла пулин те çула тухмалла е сывă çынсемпе хутшăнмалла пулсан – маска тăхăнăр.
Маскăсемпе тĕрĕс усă курни инфекцие сарăлма памасть, çакна асра тытмалла.
Манăн А (H1N1) грипп пулнине мĕнле пĕлмелле?
Хăвăр тĕллĕн сезон грипĕнчен А (H1N1) уйăраймăр, мĕншĕн тесен чир паллисем пĕр пекех: температура пысăк, пуç, пыр, мышцăсем ыратаççĕ, сунас аптратать. Сывлăх сыхлав органĕсемпе пĕрле хăвăра сиплекен врач кăна эсир мĕнле гриппа чирленине палăртма пултараççĕ.
А (H1N1) гриппа чирленĕ пек туйăнсан манăн мĕн тумалла?
Енчен те эсир хăвăра япăх туятăр, сунаслатăр, пысăк температура пулсан, пыр ыратсан:
Ĕçе, шкула, халăх пуçтарăнакан çĕре тухса ан çӳрĕр, килте ларăр.
Канăр, шыв нумай ĕçĕр.
Ӳсĕрнĕ, сунасланă чух çăвара, сăмсана пĕр хут усă курмалли ал тутрипе хуплăр, вăл çук-тăк – чавсапа (аллаппипе хупласан вирус алă çинче юлать).
Çынсен ушкăнĕ патне çывхариччен маска тăхăнăр.
Юлташăрсене, çемйĕре хăвăр чирлине пĕлтерĕр.
Хăвăр тĕллĕн больницăна тухса кайиччен малтан тухтăрпа çыхăнăр, вăл сире медицина тĕпчевĕ кирлипе кирлĕ маррине калĕ.
Грипăн çĕнĕ вирусĕ ерчĕ пулсан вируса хирĕç кĕрешекен препаратсем ĕçмелле-и?
Çук. Озельтамивир е занамивир препаратсемпе хăвăра сиплекен врач хушмасăр усă курмалла мар. Çĕнĕ грипран хăвăр тĕллĕн сипленме хăтланса препаратсем туянса укçăра сая ан ярăр, уйрăмах Интернет урлă эмел туяннă чух сыхă пулăр.
Кăкăр çитерекенсене мĕн сĕнме пулать? Грипп ерсен кăкăр çитерме пăрахмалла-и?
Çук, хăвăра сиплекен врач кăкăр çитерме чарсан кăна. Грипп инфекцийĕсене тĕпчени çакна кăтартса пачĕ: кăкăр çитерни ачасен иммунитетне ӳстерет, респираторла чирсенчен хӳтĕлет. 
Медицина пулăшăвне хăçан ыйтмалла?
Сывлăш пӳлĕнсен, сывлама йывăр чух, пысăк температура виçĕ кунран та иртмесен медицина пулăшăвĕ ыйтмалла. Чирлĕ ача ашшĕ-амăшĕн çакăн пек чух пулăшу ыйтмалла: пĕчĕк ача хăвăрт-хăвăрт сывласан е сывлăшĕ пӳлĕнсен, температура анмасан тата шăнăр туртса лартсан.
Чылай чухне ачана килтех сиплеме пулать. Ăна кантармалла, ытларах шыв ĕçтермелле, ыратнине ирттерекен препаратсем памалла (Рэйе синдромĕнчен сыхланса ачасемпе çула çитменнисене ыратнине ирттерекен аспиринсăр препаратсем памалла). 
Эпĕ гриппа чирлĕ, анчах хама лайăхах туятăп. Ĕçе кайма юрать-и?
Çук. Сезонри гриппа чирлетĕр-и, А (H1N1) гриппа-и – юрамасть. Чир паллисем иртсе каймасăр çын çине ан тухăр. Çак таврари çынсене те, ĕçтешĕрсене те грипран хӳтĕлĕ.
Çула тухма юрать-и мана?
Енчен те хăвăра япăх туятăр е сирĕн грипп паллисем пур, çул çине ан тухăр. Хăвăрăн сывлăхăр пирки иккĕленӳсем çуралчĕç-тĕк, тухтăртан канаш ыйтăр.