Учитель кунĕ умĕн Чăваш Республикин вĕренÿ институтĕнче чăваш чĕлхипе литератури учителĕсен харăс виçĕ ушкăнĕ вĕренчĕ: вĕсенчен пĕри курс пуçларĕ, иккĕшĕ пĕлÿпе хăнăху туяннине çирĕплетекен документсем илчĕ.
Юпа уйăхĕн 1-3-мĕшĕсенче – дистанци курсне çырăннă учительсем Интернетра çыхăну тытма, вĕренÿ материалне илсе кирлĕ пек хуравлама хăнăхрĕç.
3-мĕш числора чăваш шкулĕн учителĕсем 5-мĕш класра «Сăмах вырăнне çÿрекен пĕрлешÿсем» темăна мĕнле вĕрентес пирки канашларĕç. Семинара пухăннисене Ю.М.Виноградов доцент чăваш чĕлхинче ăнлава сăмах майлашăвĕпе палăртас туртăм пуррине уçса пачĕ, икĕ уроклăх 14 хăнăхтару сĕнчĕ.
Юпа уйăхĕнче пĕр тулли курс хăй ĕçне пĕтерчĕ. Кунта чăваш шкулĕн тăван чĕлхепе литература учителĕсем ФГОС вăя кĕртнĕ тапхăрта ĕçлеме хатĕрленчĕç.

Хисеплĕ ĕçтешĕмĕрсем!
Сире пурсăра та Учитель кунĕ ячĕпе саламлатпăр! Ĕçĕрте ăнăçу хыççăн ăнăçу пултăр! Ĕмĕтĕрсем тулса пыччăр!

Чăваш Республикин вĕренÿ институтĕнче професси енчен иккĕмĕш («Чăваш чĕлхипе литератури») специальность паракан программа ĕçлет.
  Программа 11 предметран тăрать. Тĕп предметсем – «Хальхи чăваш чĕлхи», «Чăваш литературин историйĕ», «Чăваш чĕлхине вĕрентмелли методика», «Чăваш литературине вĕрентмелли методика». Кунсăр пуçне программăра специальноçпа тачă çыхăннă предметсем («Пĕтĕмĕшле чĕлхе вĕрентĕвĕн никĕсĕсем», «Чăваш диалектологийĕ», «Чăваш фольклорĕ») пур. Учитель профессине тивĕçлĕ шайра тытса пыма курсантсене «Педагогикăн паян куншăн пысăк пĕлтерĕшлĕ ыйтăвĕсем» тата «Патшалăхăн хальхи вĕренÿ политики. Вĕренÿ стандарчĕ» модульсем сĕнетпĕр.
  Чăваш чĕлхипе тата литературипе экзамен, ытти предметсемпе зачетсем тытмалла. Зачетпа экзамен сехечĕсене шута илмесен программăна 544 сехетре вĕренсе пĕтермелле. Курс кĕрет (очно), кĕретсĕр (заочно) тата дистанци вĕрентĕвен мелĕсемпе иртме тивĕç. Преподавательсем курсантсене лекцисем вулĕç, практика занятийĕсенче ĕçлеттерĕç.
  Курса ăнăçлă пĕтернисене федераци шайĕнче çирĕплетнĕ формăпа ятарлă диплом параççĕ. 
  Вĕренÿ ăнăçлă пуçланса кайтăр тесен курсра сахалтан та 15 çын пулмалла. ... Малалла вула »